Општина Македонска Каменица ги поканува граѓаните утре, 19 август 2026 година, активно да се вклучат во втората сесија на Проектниот форум, која ќе започне во 09:30 часот во Спортската сала зад СОУ „Миле Јаневски – Џингар“.
На сесијата ќе бидат презентирани пет концепт-проекти изработени врз основа на предлозите што граѓаните ги дадоа на првата форумска сесија, посветена на локалниот економски развој.

По презентацијата ќе следува отворена дискусија за содржината, значењето и приоритетноста на предложените концепти. Граѓаните ќе имаат можност директно да учествуваат во процесот и да придонесат во изборот на предлозите што ќе бидат доразработени во предлог-проекти за следната форумска сесија.
За реализација на приоритетниот проект е обезбеден проектен фонд од 30.000 американски долари, во кој Општина Македонска Каменица учествува со 50 проценти од средствата.
Форумскиот процес овозможува директно учество на граѓаните во креирањето на локалните приоритети и во изборот на проекти значајни за Македонска Каменица и нејзините граѓани.
Проектниот форум се реализира во рамки на проектот „Зајакнување на општинските совети – Фаза 2“, финансиран од Владата на Швајцарија и Министерството за локална самоуправа, а кофинансиран и спроведуван од УНДП во соработка со национални и локални партнери.
Општина Македонска Каменица ги повикува заинтересираните граѓани да присуствуваат и активно да се вклучат во втората форумска сесија.