Градоначалничката на Општина Македонска Каменица, Соња Стаменкова, денес во Белица, Република Бугарија, оствари работна средба со градоначалникот на Белица, Радослав Ревански, градоначалникот на Јакоруда, Мехмед Вакљов и градоначалникот на Карбинци, Виктор Паунов, во рамки на прекуграничниот проект ALLURE.
На средбата се разговараше за реализацијата на предвидените проектни активности, меѓусебната соработка и можностите за поврзување и промоција на природното и културното наследство на партнерските општини.

За Општина Македонска Каменица, проектот носи конкретни придобивки преку реализација на планинска велосипедска патека во должина од 26,1 километри и набавка на пет електрични планински велосипеди.
Со реализацијата на овие активности ќе се создадат нови можности за развој на активниот и одржлив туризам, подобро искористување на природните потенцијали и збогатување на туристичката понуда на Македонска Каменица.
Прекуграничната соработка во рамки на проектот ALLURE овозможува поврзување на природното и културното наследство од двете страни на границата и придонесува кон праведна транзиција и развој на локалната економија.